Сыктывкарын нэммӧдісны Россияса нимйӧза артистка Ия Бобраковалысь югыд паметсӧ

Моз тӧлысь 27–ӧд лунӧ кыпыда восьтісны казьтылана пӧв Ия Петровна Бобраковалы –Россияса нимйӧза артисткалы, Коми АССР-са искусствоясын нимӧдана уджалысьлы, Коми Республика канму премия босьтысьлы, коді уна во чӧж вӧлі Коми Республикаса опера да балет театрын художественнӧй веськӧдлысьӧн да медшӧр режиссёрӧн. Казьтылана пӧв ӧшӧдӧма Интернациональнӧй уличаса 113 номера керкаӧ, кӧні сійӧ овлӧма.

Татчӧ волісны Коми Республикаса Веськӧдлан Котырӧ пырысьяс, Сыктывкар администрацияын уджалысьяс, карса ветеран Сӧветын зільысьяс да творчествоа йӧз.

Коми Республикаса культура, туризм да архив удж министр Сергей Емельянов пасйис Ия Бобраковалысь пайсӧ да енбиалунсӧ. Каналан сӧветса веськӧдлысьӧс вежысь Валентина Жиделева воис ӧти кывйӧ шылад тэчысь Сергей Носковкӧд, коді вӧзйис Ия Петровна нимӧн шуны сыктывкарса улича. «Та кындзи, – пасйис парламентса вице-спикер, – лыддя, мый юркарса микрорайонлы позьӧ сетны «Сыктывкарса тулыс» фестивальлысь ним, ӧд тайӧ нималана фестивальлы подувсӧ пуктіс буретш Ия Петровна Бобракова».

«Ия Петровна вӧлі бур да быдӧнлы дона артисткаӧн, енбиа веськӧдлысьӧн. Сылӧн выныс, уджыслы став эбӧссӧ сетӧмыс да сямыс отсалісны Ия Петровналы лӧсьӧдны дзирдалана асшӧр петкӧдчӧмъяс, быдӧн наысь вӧліны ыджыд лоӧмторйӧн», – индіс «Сыктывкар» каркытшса веськӧдлысьӧс вежысь Елена Семейкина.

Театрын уджалысьяслӧн Коми котырӧн веськӧдлысь Елена Пекарь аттьӧаліс ставнысӧ, коді пырӧдчис тайӧ уджтасас, на лыдын юркарса ветеран сӧвет да Сыктывкарса веськӧдланін, коді сетіс позянлун ӧшӧдны тайӧ пӧвсӧ.

***Ия Петровна Бобракова – Коми Республикаса опера да балет театр лӧсьӧдӧмын да сӧвмӧдӧмын зэв тӧдчана морт. Ас бӧрас сійӧ кольӧма уна аслыспӧлӧс удж. Сылӧн водзмӧстчӧмӧн юркарын нуӧдӧны опера да балет искусстволысь «Сыктывкарса тулыс» фестиваль.

коми

Источник: Администрация города Сыктывкар

Добавить комментарий

Ваш e-mail не будет опубликован. Обязательные поля помечены *